各位街坊，买二手楼本嚟系开心事，但万一银行突然话：“唔批你嘅贷款喔！”咁就真系头痕过食黄连！咁呢只“死猫”，究竟边个要食落肚？肥胜嚟同你八一八！

情况一： 阿爷改政策，神仙都冇符！

如果系因为政府突然出咗新规（比如限贷、加息），搞到你嘅贷款批唔落嚟，咁就真系“天要下雨，娘要嫁人”。买同卖双方都冇错，唔使“孭镬”，份约可以和平“分手”，订金理论上要退翻。呢啲叫“不可抗力”，冇得拗！

情况二： 自己“黑历史”，冇得怨人！

如果系因为你肥胜哥（咳咳，系买家自己）嘅个人信用报告“花碌碌”（逾期多、负债高），或者收入证明“水份大”，银行睇完拧晒头，咁就真系要认“衰仔”嘞！违约责任梗系买家你嚟孭！订金分分钟冻过水，仲可能要赔钱俾卖家添！所以，落订前，查清楚自己份“威水史”（征信报告） 好紧要！

情况三： 卖家“搞搞震”，佢要负责任！

咦？如果系因为卖家嘅问题呢？比如佢间楼本身有“古惑”（产权唔清、被查封、仲有按揭未搞掂），或者佢提供嘅资料“流流哋”，搞到银行唔肯放款。咁就唔关买家事啦！呢个“镬”，卖家孭硬！买家唔单止可以攞翻订金，仲可以要求卖家赔偿损失㗎！

肥胜醒你两招：

签约前做定功课： 自己先查征信，揾相熟银行或者按揭顾问初步评估下贷款成数同难度。

白纸黑字写清楚： 份买卖合约一定要写明，万一贷款批唔落嚟点算！系退订？定系买家自己补钱？定系点？写清楚就冇咁易“嗌交”！

总结： 贷款“甩底”边个孭镬？睇原因！政策变，大家冇事；买家衰，自己孭；卖家衰，佢负责！签约前醒醒目目，查清楚倾明白，咪做“水鱼”！

老广街坊饮早茶必备楼市快报！（粤语创作·街坊至啱key）晨早七点半准时啲，阿胜用最盏鬼粤语同你倾楼市！（声明：本号全部文章系白话写，外省朋友睇唔明可以call翻译）• 楼价升跌 （白话解读：贵过龙虾定平过白菜）• 执笋盘攻略 （教你点样执到阿妈都赞叻）• 拆祠堂风声 （边条村阿伯最牙烟）跟实「广州好房子」，买楼掂过碌蔗！

广州好房子传播核心房地产资讯，聚焦实用购房干货，坚持以“不一样的角度”致力于内容创作，见证广州的发展变迁，感受最真切的买房心声！757篇原创内容 公众号 ，